按怎予你的教育部臺灣台語輸入法閣較好用

Jan 8, 2026

教典僻智識系列第 47 篇

建中實用工具系列第 6 篇

這篇文章是台文

#台文 #教典 #輸入法 #拍字

我拍 638 音節的教典阿明的一生愛 9:25 秒，平均是 68 音節／分
你若是嘛想欲測你的拍字速度，會當來遮試

今仔日教育部公告新版本的輸入法矣，我有參與早期的測試，這篇文章來分享一寡設定的撇步佮操作的技巧，這篇文章上下底嘛會分享我所做的 輸入法詞庫增補檔案 ，歡迎逐家直接掠去用。

偏好設定

我會共「關聯詞功能」、「系統錯誤音效」、「漢字模式輸入聲調」禁起來

我是用無啥會著「關聯詞功能」，這个功能若是手機仔應該會較實用，電腦家己欲拍啥貨家己輸入就好。

系統錯誤音效是你拍字揤著佮羅馬字無相關的符號系統就會放送音效，我感覺聽著略仔煩，共禁起來矣。

漢字模式輸入聲調我上建議逐家共禁起來，禁起來了後你的數字齒就專心提來揀字就好，拍字效率會加真好，這馬詞庫內容已經真豐富矣，多數的詞干焦有拍聲母韻母其實攏選會著。

台羅模式

揤 ` 就通佇漢字佮羅馬字兩个模式之間切換，另外有一个快速齒建議逐家愛學會曉，揤 shift + space 就通切換標點符號的全形／半形模式。若欲拍全羅，愛會記得共標點符號切換去半形喔。

台羅模式的輸入理路較無仝，只要揤聲調，規个音節就會直接送出去。建議逐家會當逐改攏是拍詞組尾字的聲調，只要詞庫有收錄就會當拍出你欲愛的詞。嘛會當去台語文拍字練習揀練習羅馬字的模式加練習喔。

拍標點符號

毋知是按怎，教育部目前的操作手冊竟然無寫標點符號的輸入方式。干焦有講揤 ctrl+7通拍開符號齒盤。因為開發輸入法的公司就是開發自然輸入法的網際智慧股份有限公司，所以標點符號的輸入方式基本上佮自然輸入法仝款。遮共一寡捷用的符號輸入方式整理做表格，你若是想欲拍的揣無會當去網路搜揣彼个符號佇自然輸入法的輸入方式，通常就揣會著矣。

其中頓號、是用'，佮一般齒盤頂面用的\無啥仝款，這是自然輸入法特色，另外刪節號嘛較特殊，需要用著 alt+;｜ option+; 去拍。

符號	全形模式	半形模式	齒盤組合
逗點	，	,	`,`
句點	。	.	`.`
問號	？	?	`shift`+`/`
驚嘆號	！	!	`shift`+`1`
冒號	：	:	`shift`+`;`
分號	；	;	`;`
單引號、半形中括號	「｜」	[｜]	`[` ｜`]`
雙引號、半形大括號	『｜』	{｜}	`shift`+`[`｜ `shift`+`]`
頓號、反斜線	、	'	`'`
刪節號	…	…	`alt`+`;`｜ `option`+`;`
書名號、大於小於	《｜》	<｜>	`shift`+`,`｜ `shift`+`.`
轉折號	—	—	`alt`+`shift`+`-`｜ `option`+`shift`+`-`

善用語詞管理

目前的學習功能猶無遐巧，干焦會共較捷用的語詞排較頭前，這嘛是我個人感覺目前的教育部輸入法佮意傳輸入法上袂比得的所在¹。若是詞庫無收錄的語詞猶是愛家己去語詞管理內底添會較好勢。
語詞管理建議 一定愛用正式台羅去添，莫用數字式的，抑無台羅模式會拍出數字式台羅喔²。

語詞管理嘛有允准收錄有空白的詞，所以你通好共平常時仔捷咧用的語詞組合寫入去，拍字會閣較方便，比論講收一條 嘛是｜mā sī，就會當拍 masi 揀著 嘛是 矣。建議逐家用著啥感覺無好拍就緊去添，就會愈拍愈順矣。

進階語詞管理運用

語詞管理的「漢字」這欄其實無一定愛拍漢字，若是遮拍羅馬字就通佇漢字模式拍羅馬字，所以你會當共你慣用寫羅馬字的語詞家己添入去。另外佮意拍 Emoji 的朋友嘛通共你捷用的 Emoji 變做詞條，比論講收一條 🥺｜pài-thok，就通佇拜託別人的時陣拍 🥺 矣。
當然，欲共語詞管理當做 snippet 功能咧用嘛會使，你若是收一條 [email protected]｜phue-tháng 就通好真方便共你的 email 拍出來。

建中的詞庫增補

⚠️

警告

這个資料表是建中個人整理佮維護，難免會有錯誤，若是有錯誤會當去 Github 開 Issue，抑是寄批共我講。建議逐家安裝我的詞庫進前先備份家己的語詞資料，避免鬥了無佮意想欲反悔喔！

這馬的輸入法詞庫主要是源自教典，所以真濟所在是無夠，比論講教典有「拜一」、「拜六」、「禮拜」，毋過你若欲拍「拜二」、「拜三」、「拜四」、「拜五」詞庫就無。另外詞庫有「立法院」，煞無其他五院機關，新聞捷出現的政府主要部會像「內政部」、「交通部」、「國防部」嘛攏無收錄。³

遮提供我個人所整理的 輸入法詞庫增補檔案 予逐家，內底攏總有 2827 筆資料，有較有系統性的整理政府各部門、數字時間等等的詞，恁會當掠去安裝，予家己的輸入體驗閣跤好。

攏總有下跤五个檔案，恁會當看恁的需求去鬥：

一府五院：總統府、行政院、立法院、司法院、監察院、考試院的組織相關機關名稱
數字、時間、日期：遵照台羅手冊的所有連寫的數字詞、數量詞閣有時間、日期相關的詞
台／臺：目前輸入法詞庫有收錄的「臺」相關詞的「台」版本
內政部菜市仔名：內政部名姓統計資料的頭前 100 名菜市仔名的台語讀音，予你通較方便拍出各種人名
教典僻智識：建中寫教典僻智識捷用的教典相關術語，閣有一寡家己捷用的詞

希望逐家拍字通愈來愈順，愈來愈緊

教育部經過 15 冬新推出的輸入法，毋管按怎是一定比 15 冬前的版本進步不止仔濟啦，雖然我猶是有真濟誠失望的所在³，毋過經過一寡設定佮技巧，猶是通用。嘛希望這篇文章分享的內容對逐家有幫贊，嘛歡迎逐家加利用台語文拍字練習加練習。

而且毋知是按怎，我的 2022 Macbook air 只要連續用輸入法一段時間學習功能就會雄雄失去效果，電腦重開抑是閣登入就會解決。 ↩︎
我個人認為系統應該愛自動共數字式台羅轉做正式調符，已經有佮團隊反應，希望𪜶有願意採用。 ↩︎
補充一个僻智識，你若是拍「lingaliau」會出現「 苓仔寮、能雅寮 」，拍「saisun」會出現「 司孫(背稱) 」，這是因為對應的教典詞目就是生做按呢，一个是地名的特殊替例，另外一个是方言差表內底的註解。我自頭舊年九月參與內部測試都已經有反應相關問題矣，嘛有共各種教典特殊替例愛排除抑是閣整理的所在整理做文件予團隊。毋過團隊四個月以來攏無處理，今竟然連這个問題都猶未修理好勢就直接上線矣，我個人對這點是誠不滿。毋過能力範圍內底會當做的都已經做矣，干焦通佇遮 khām-phû-lián，希望以後緣份若到團隊猶得通修正問題。 ↩︎ ↩︎

教典僻智識系列

建中實用工具系列