台語文拍字練習網頁
這个網頁會當練習台語文拍字，入去了後簡單設定就通好來練習拍台語，手機仔嘛會當練。歡迎逐家練習了後留話分享你的拍字速度。
主要功能介紹
主要的模式會對教典例句隨機抽選，揀你欲愛練習幾句，欲練習拍漢字抑是羅馬字就會當開始。慣勢用白話字的朋友嘛通好共羅馬字模式改做白話字。Seed 會當免拍，若是欲佮朋友比賽，會當拍仝款的 Seed ，按呢逐家用仝款的題目比賽會較公平。
設定畫面
入去練習畫面了後，你會使先佇頭一逝文字框共你的輸入法撨好勢，揤 Enter 就會自動跳去頭一句開始算時間。你若拍字系統嘛會若標注你的輸入有正確抑無。
練習畫面
練習完成了後，系統會顯示你的成績。標點符號佇咧回答的時陣會標示有正確抑無，毋過袂算入去成績，干焦會算你每分鐘拍幾个音節。
練習完成的畫面嘛會顯示這改練習的 Seed，若是想欲閣練習仝款的題目會當用這个 Seed 去重現。
成績畫面
進階功能：自訂文本
揀自訂文本會使設定家己欲愛的文本，輸入文本的漢字佮羅馬字，系統會自動輸出漢字佮羅馬字互相標注的格式。漢羅濫寫的文本嘛會自動判斷。
練習文本若揀「單一文本」，就毋免設定漢羅對應的文章，任何的文章攏通好擲入去練習。
嘛會使揀「單一文本」，就毋免設定漢羅對應的文章
自訂文本遮嘛有羅馬字轉換的家私，揤落就通共你的文本佇台羅佮白話字之間轉換。
內建羅馬字轉換家私，予你換做你慣勢的系統
加講幾句
中文佮英文已經有真濟通練拍字的網頁，英文有 Keybr 佮 Monkeytype，中文有花蓮縣打字練習網。毋過台文以早干焦有烏衣行老師做的練習羅馬字輸入的網頁，並無文章抑是詞彙的練習。以早我嘛捌佇活用教典 101捌分享過欲按怎共教典詞彙揀出來擲入去 MonkeyType 練習，毋過欲設定誠實是傷複雜。這馬有這个網頁應該是加真方便。活佇有 LLM 的時代誠實是真方便，無 AI 家私鬥相共，欲開發這款家私猶閣愛學足久的工夫才做會到。
這个網頁尊重逐家的隱私，無廣告、無任何的追蹤佮記錄，所有的運算攏佇你家己的設備完成，你會當放心拍想欲拍的字。網頁原始碼以 CC0 無著作權開源佇 Github。教典例句文字遵照教典以創用 CC 姓名標示-禁止改作 3.0 臺灣 授權條款使用。