連字符入門②－「詞組」內底的詞「基本上」分寫
今仔日欲來𤆬逐家做伙閱讀臺羅手冊連字符號使用基本原則第二條：
「詞組」內詞與詞基本上分寫，只有單音節之補語或單音節方位詞與前一詞連寫。
看起來這个「基本上」分寫的例外是像「桌頂 toh-tíng」、「大門後 tuā-mn̂g-āu」這種加上方位詞的狀況，閣有「做煞 tsò-suah」、「看著 khuànn-tio̍h」這種加上補語的情形。
講到遮可能你就感覺奇怪矣，昨昏講著的「攑手 gia̍h-tshiú」、「攑頭 gia̍h-thâu」敢袂當共看做是一个「動詞+名詞」的動詞詞組，然後共分寫咧？這兩个詞的組成嘛無啥物方位詞抑是補語啊？
因為連字符號規則第六條閣按呢寫：
詞組慣用時可能發生「詞彙化」，既已詞彙化就已經不是詞組而是詞，因此音節與音節之間不可分離，必須連寫。
「攑手 gia̍h-tshiú」佮「攑頭 gia̍h-thâu」就是真好的「詞彙化」案例，「gia̍h」拄著「tshiú」佮「thâu」的時陣已經毋是伊原底的意思，愛共「gia̍h-tshiú」、「gia̍h-thâu」看做一體。所以我前一篇文章才會直接講「gia̍h-tshiú」佮「gia̍h-thâu」是一个雙音節的動詞。
毋過並毋是任何的狀況攏像攑手攑頭遐爾直覺，真濟狀況攏是語感在人，有人認為「鉸頭毛」毋但是單純的「鉸」，是規套的服務，閣愛 siat-tooh，愛連寫。毋過像教典的體例就是共分寫。
詞彙化語感測驗表單
詞彙化語感測驗表單
遮提供一个趣味的「詞彙化語感測驗表單」，共真濟教典類似的例攏整理理，歡迎逐家來寫看覓。就你的語感你會共遮的詞當做是分寫的詞組，抑是愛連寫的詞彙化的詞，寫了會共你講分數閣有教典的體例。像「包機」、「包餡」、「包豆餡」、「包紅包」、「包水餃」佗幾个愛連寫，佗幾个閣愛分寫咧？歡迎佇表單分享你的想法。 請注意，這个表單分數寫較懸並無代表你較厲害，干焦代表你的語感佮教典編輯人員較接近，若按呢歡迎加注意教典編輯人員培訓營的資訊，加入編輯教典的團隊 😉 啊若是你的分數足低嘛免緊張免煩惱，「詞彙化」的標準本來就隨人的語感無啥仝，無論你分寫抑是連寫多數的人攏看有，檢定考試嘛袂去考這，嘛袂共你扣分喔。