教典教你按怎做人
揣「做人愛」的部份搜揣結構
佇「用臺灣閩南語查用例」搜揣「做人愛」，就會當揣著十項教典教示咱的做人大道理，對這當中會當體會著教典誠注重人的品性，嘛佮以早鋪的第十二篇「教典上討厭的人」有符合一致的人物設定，比論講人愛較樸實(phok-si̍t)，莫傷虛華逐工愛展寶；愛注重倫理守本份，袂當凊彩干涉別人的代誌，嘛袂當講話無信用。教典真正是逐家上正派閣高尚的朋友。 是講這十句例句真適合提去 Line 群四界傳呢 😅
- 咱做人愛有「家己栽一欉，較贏看別人」的志氣，萬事靠家己，骨力拍拚，才有成功的一工。
- 咱做人愛有主見、有正義感，若干焦會曉「西瓜倚大爿」，早慢會予人看無目地。
- 做人愛認真拍拚，才會有出脫。
- 做人愛較樸實咧，毋通傷虛華。
- 做人愛守本份，才會當佇社會上佮人徛起。
- 做人愛重人格。
- 做人愛重倫理。
- 做人愛知影伸勼，才袂得失人。
- 做人愛知見笑。
- 做人愛有量，才會有福報。