教典大惡人——名姓袂當講出來的「彼个人」
揣「彼个人」會得著足濟人物負面形容的例句
昨昏介紹教典阿明的一生，逐家反應袂䆀，嘛有人開始去稽考教典阿英、教典阿榮、教典阿美的人生閣是啥款，像阿英的運途嘛誠䆀，定定破病閣有拄著水災，毋過伊的囝孫就真有孝。逐家攏誠天才，共各位朋友揤一个大大大的讚 👍
今仔日的教典僻智識繼續來介紹教典宇宙的大反派，去教典「用臺灣閩南語查用例」功能揣「彼个人」，就會揣著 41 个例句，逐家去揣就會發現教典的「彼个人」真正是十惡不赦（si̍p-ok-put-sià），41 條例句無一句好聽話，講伊惡毒，講伊心腸䆀、橫霸霸閣屎桶、痟痟、自私、奸巧、橫逆甲連老爸都敢拍……
這可能反應講編輯團隊咧編例句的時陣其實是誠細膩，講歹聽話的就袂去叫人名，抑無教典若寫「阿中心肝誠惡毒」我百面會寫批寫甲 in 共主角改掉為止 😠，寫其他人名嘛是仝款道理。
教典一直攏有分類索引的功能，毋過形容人的詞是分做五个「才智能力」、「個性風格」、「道德評價」、「體態樣貌」、「氣質態度」，無去分「正面形容」抑是「負面形容」，顛倒是去查詢「彼个人」的例句就是「負面人格形容」的分類矣 😅