連字符入門①－「詞」內底的音節連寫
今仔日欲來𤆬逐家做伙閱讀臺羅手冊連字符號使用基本原則第一條：
「詞」的音節與音節之間基本上連寫，但結構太複雜或字數太多時分寫
無仝的詞性咱就愛共分寫，像咱一般情形咧講「攑手」抑是「攑頭」的時陣，彼是「一个」雙音節的動詞，所以愛共連寫做「gia̍h-tshiú」、「gia̍h-thâu」。除非是像這兩張 ai 畫的特殊情境，才有機會真正的去「gia̍h tshiú」抑是「gia̍h thâu」。 佇教典當中，「攑～」相關的例閣有「攑箸 gia̍h tī」、「攑手電 gia̍h tshiú-tiān」、「攑筆 gia̍h pit」、「攑爪仔 gia̍h jiáu-á」、「攑菜刀 gia̍h tshài-to」，遮的例攏是「動詞+名詞」的組合，所以攏愛共分寫。
連寫分寫攏有咧用的情形
其實有影是有彼種分寫佮連寫兩種意思攏有咧用的情形，像「上好」就是一个真趣味的例： 若意思是「副詞+形容詞」的結構就愛分寫，像「天然的 siōng hó」；若是兩字當做一个「副詞」咧用的時陣就愛連寫，像「人工的 siōng-hó 是莫食傷濟」
莫共連字符規則佮變調濫糝做伙
有一个真捷看的迷思是會共連字符號佮變調濫咧講，連字符號佮變調是兩个各自有家己的規則的兩層代，並袂講兩个音節若連寫，頭前彼字就愛變調，分寫就唸本調。像「天然的 siōng hó」佮「人工的 siōng-hó 是莫食傷濟」兩句話的「siōng」攏愛讀變調；「攑手 gia̍h-tshiú」連寫、「攑箸 gia̍h tī」分寫，兩个「攑 gia̍h」嘛攏愛變調，佮連字符號並無關係。
這張圖的人咧 gia̍h tshiú，伊攑的手嘛咧 gia̍h-tshiú
這張圖內底的人咧 gia̍h thâu，伊攑的彼粒頭嘛拄好咧 gia̍h-thâu