教典的「華語借音詞」
三條教典的華語借音詞
逐家攏知影臺語有足濟「臺華共同詞」，嘛有一寡詞算是「華語外來詞」，你敢知影教典甚至閣有收「華語借音詞」？
今仔日的教典僻智識欲共逐家分享教典內底收的三條「華語借音詞」，分別是收佇主詞條的「落跑 làu-phâu」、收佇「挩鍊仔 thuah-liān-á」方言差表的「拉鍊 la55-lian531」佮收佇「尪仔 ang-á」方言差表的「洋娃娃 ia̋ng-uá-ua」。落跑算是較特別的一半臺語音一半華語音的詞，la55-lian53 佮 ia̋ng-uá-ua 就完全是華語音借過來矣。
想起以早捌聽朱約信先生佇演講講耍笑講「『麥當勞』的臺語就是『mài-táng-lâu』」，教典內底有影是有類似的例呢 🤣。
猶是愛先共一件代誌講予清楚，教典的方言差表較算是「補充性質」，是教典內底規矩較無嚴格的所在，「詞彙欄」有臺語漢字、華語漢字、閣有日文，「音讀欄」嘛有的外來語是數字音值，有的外來語有逆推本調，才會有數字音值的 la55-lian53 佮逆推本調的 ia̋ng-uá-ua，教育部有佇批信當中講過方言差表當咧進行重新檢視佮更新，後來編輯委員會欲按怎處理方言差猶愛等 in 決定。逐家會當做伙來關心喔。
有關教典僻智識的文章再利用
昨昏的教典相命術誠受著逐家的歡迎，看逐家做伙討論感覺誠心適，閣佇米粉老師遐看著教育現場的先生隨共這變做 in 的教學活動，有影是真感動。我嘛佇遮先明呼明唱，教典僻智識系列文章誠歡迎逐家提去分享，抑是共這當做任何創作的題材、重製家己的版本，攏會用得。免特別共我問，毋過你若願意共我講我會真歡喜 😄。
-
這是目前教典唯一猶是用數字音值標示的詞目，無確定以後敢會嘛綴日語外來詞嘛套用逆推本調的體例。 ↩︎