教典使用人次記錄
教典每10分鐘的使用人次視覺化
教典這馬的使用人次已經超過 6 億矣，舊年 11 月干焦 4 億 4，半冬以內增加欲兩億呢，當然教典網頁針對這个人次的計算方式是比 Youtube 人次計算加真冗，逐改重整理抑是揣新的詞攏有準算。 我自舊年 11 月叫 ai 寫一个簡單的程式走佇 Google App Script，這个程式每 10 分鐘會自動去記錄教典的使用人次，到今已經有記錄 7 個月的資料矣，另外嘛有寫一个網頁共遮的資料轉做視覺化的圖。 這个網頁會根據每 10 分鐘的使用人數變化決定每一格的食色，愈濟人使用色水就愈光，粗看就真明顯看會出來教典人次佮國校仔上課時間是真有關聯：
- 透早八點至下晡四點是普遍每一工人數上濟的時間
- 有真明顯的「透早四節課、下晡三節課、中晝歇睏」的分佈
- 拜六禮拜人數明顯比拜一至拜五較少，而且無明顯的「上課／下課」的規律
- 正月中開始歇寒了後，就失去「上課／下課」的規律
- 二月底開學了後，又閣回歸「上課／下課」的規律
二月寒假期間無明顯的上下課時間變化
2026 肉粽節連假大雷雨致使教育部真濟網站歹去
這个網頁若是掠袂著資料，會根據頭前後壁的數據自動去用線性插值推論，若是網站死去，嘛是會明顯有一段期間無人咧使用。像者掠著的資料來講，舊年 12/12 的半暝兩點至三點有欲一點鐘教典的網頁掠袂著資料。
今年 6 月肉粽節連假臺灣是四界攏咧摔大雨1，國家級警告都發出去矣，結果教育部有真濟網站自 6/18 下晡攏歹去矣，印象中毋但教典，臺羅拼音學習網、教育部全球資訊網、客語辭典遮的網頁攏歹去。一直到隔轉工暗時七點左右才修理好勢。對這个網站就會當看著遐有一段時間色水攏是烏色的。
6/18 超過 24 點鐘無教典通用