教典編輯培訓初階研習DAY3

今仔日透早是盧廣誠先生的課，下晡學員分做十組，分開佇兩間電腦教室進行詞目試寫，並且分開由盧先生佮潘先生講評。

下晡佮仝組的組員開講，熟似新朋友真歡喜，仝組的吳先生是臺灣圖書館的員工，有做真濟因應國家語言發展法相關的事工。像𪜶這馬有提供各種國家語言的標示佮廣播，除了台語客語，閣有泰雅族語，我毋捌去過臺灣圖書館，後回應該愛來去拜訪。

例句的編輯環境竟然是 word，word 對台語文編輯誠實是不止仔歹用，濟濟功能攏真無友善，我佇 以早的講座 捌講過，我佇問卷的回饋強烈建議團隊莫用 word，改用功能上簡單的記事本都較規氣。

三工的研習真緊就過去矣，主辦單位是誠用心，逐工中晝頓佮暗頓攏真好食。毋過我對課程安排就無遐滿意矣，佇回饋的問卷寫較濟意見，我嘛貼佇遮，向望研習通好愈來愈好。

團隊平安：

我是建中，真感謝三工的課程內容佮招待，嘛感謝委員群予我通好參與這改的研習。我對三工的師資組成佮課程內容安排有淡薄仔失望，我盡量共我所看著的問題佮具體的建議佇遮詳細描述。用詞可能會略仔較雄，若是有啥物所在是我的誤解歡迎恁才閣共我講，真失禮。

先講實作的部份，有關「辭典體例」的部份應該愛佇三工的課程安排當中予逐家知影，並且安排適當的評量活動等等，若是頭一工就有簡單的試寫練習佮先生的講評，相信研習效果通加較好。學員才通較早知影家己欲編輯教典應該愛知影啥，囥佇第三工下晡做一改做會充滿遺憾，講師講評的時間嘛無夠，甚至閣有人猶閣完全狀況外，編的詞條完全無合體例。

詞目試寫的編輯家私強烈建議團隊以後莫用 word，word 愛費太濟精神浪費佇「外觀」、「字型」、「格式」等等的問題，word 的「自動校對」對台語文的編輯嘛干焦有擾亂功能爾。真濟資深的學員干焦浪費時間佮這个無理想的編輯環境戰鬥就時間攏無去矣。不如單純用記事本較規氣，一逝屬性名一逝內容按呢編嘛較單純。

有關課程內容安排，三工的課程真正佮「編輯」本身直接相關的內容傷少，干焦林先生的內容講著例句的功能佮觀念、盧先生的課講著詞性、義項的編寫原理。而且老師群內底應該愛有「現此時的教典維護團隊咧編寫詞目的人」的參與會較適當。除了程先生，無任何一个先生真正是目前教典維護團隊的核心成員，偏偏課程設計又閣安排程先生去講真濟人攏有才調通講的漢字文字學，又閣無彩遐濟時間講火星文、語言意識的代誌，誠實是真拍損。現此時團隊的分工佮經營經驗、由語料庫做收詞的細節、教典維護的理想佮未來等等才是較要緊閣適合程先生做分享的內容。

以上建議，向望團隊參考，希望研習的品質通好愈來愈好

敬祝 平安順序

建中