正規表達式工作坊的課程發展佮設計
第二工下晡下課逐家攏一直提餅來囥我的桌頂，是共我當做金孫咧飼喔🤪
十一月中的這个拜六禮拜兩工佇中教大舉辦兩工的教典正規表達式研習工作坊，頭一个版本是佇師大台文所兩點鐘分享，舊年底佮今年初捌辦過臺北臺中高雄三場，又閣受臺南輔導團邀請辦過臺南場，所以這改算是第六改舉辦。到今這个課程的完成度嘛已經真懸矣，這篇文章會整理課程發展過程。
畢竟教 REGEX 袂輸咧教程式，有足濟較抽象的理路愛消化佮活用，一工六點鐘的工作坊明顯是傷忝頭，以早頭一改佇高雄場辦的彼改我內容又閣準備甲傷貪心，嘛對學員的性質無遐捌，教甲下晡體力閣無夠，嘛有足濟臨時的狀況愛處理。
這改頭前咧規劃的時陣，團隊就提出講改做兩工透早各三點鐘的課，下晡另外安排其他老師的演講，予學員有通消化，嘛予我袂遐忝。毋過講後來第二工下晡的良儒先生臨時身體無爽快，我臨時欲來代課，變做兩工九點鐘的工作量 🥺。佳哉教這是誠爽，身體會忝心理煞袂𤺪。遮的學員每一个攏是拜六禮拜閣願意報名來上課的人，毋免了任何精神處理學習動機是一个老師上歡喜的代誌。
教學內容的發展
線頂講義
教學內容安排佮講義到今嘛發展甲第六代矣，原底攏有寫足濟字的講義囥佇 HackMD，對遮的講義嘛看會出我的教學內容的調整。初代佇師大其實講 REGEX 的部份真少，多數的時間攏咧𤆬逐家操作 Google Sheet 直接去耍教典原始資料。佇高雄場隨踢著鐵枋，遮的學員多數攏是各地資深的本土語文教師，人都會當做我的爸母矣，咧操作電腦並無遐扭掠，所以高雄場試一下就發現這應該愛修改，共多數的時間閣較專心囥佇 REGEX 的操作就好，賰的囥佇示範佮補充。
到第五代台南場其實是以紙本講義佮心智圖為主，這改的兩工課程我認為予逐家閣掀講義傷過麻煩，規氣取消講義，全部攏用白枋佮紙本講義呈現就好，所以線頂講義並無第六代。
紙本講義
佇高雄佮台北場的經驗予我發現，遮的學員逐家電腦拍字並無遐緊，甚至是操作無 si̍k-si 的電腦佮輸入法，逐家猶是攏以紙本的筆記為主。台中場我增加一張一頁 A4 的紙本講義，效果是袂䆀，逐家會當直接佇講義頂面做筆記。
佇台南場紙本講義更新至第二代，共主題切做八段，一頁揣漢字一頁揣羅馬字，結果這張講義變做我台南場的救星，彼改台南場是用 iPad 咧進行，iPad 切換瀏覽器分頁是誠無方便，我就基本上倚靠紙本講義完成課程。佇這回閣有學員建議這會當共印做苴枋，後回就來印好矣 😆，揣印刷廠印這應該是真俗，嘛會當做彩色的。
心智圖、白枋
頭一改佇高雄場透早的課教了，中晝就發現遮的搜揣的理路應該愛閣整理一遍，共畫做圖予逐家閣較好理解。下晡我就隨佇教室電腦安裝 Xmind，利用心智圖現場共搜揣的理路順一遍，逐家的反應嘛是真好，順紲會當善用我的拍字速度。
後來畫心智圖變做一个固定的活動，逐改我講一段，就隨共拄才的重點拍佇心智圖頂面做整理，我嘛會事先共教學的大綱囥入去，提示我紲落來欲教的內容。
心智圖的功能其實就類似老師佇烏枋寫字，毋過我毋是用粉筆，是用齒盤拍。我原底攏是用 Xmind 咧畫，用投影機抑是切畫面予逐家看，上新的這改我發現 Canva 有提供類似白枋的功能，逐家攏毋免登入就會當看，我就改用 Canva 整理筆記，效果是袂䆀，因為學員嘛會當用家己的設備看，𪜶會當看家己欲看的部份。另外 Canva 嘛有內建支援台語文的源樣黑體，顯示台羅佮漢字嘛攏無問題。而且按呢基本上就無啥需要切畫面矣，上課的體驗是閣較順。
活用教典 101
活用教典 101 是第二改台中場增加的教材，因為課程內容較專心佇 REGEX，有關教典原始資料的部份我另外整理這个檔案，會當毋免有表格軟體的技術就通好看教典原始資料，我甚至共一寡以早整理的資料佮功能加入去，比論講漢字詞目、音節數索引、用 REGEX 揣例句等等。按呢會當以介紹為主，毋免了傷濟氣力咧操作，有興趣的人嘛通家己研究。
Padlet 互動白枋
Padlet 是我佇衛理熟似的老師共我介紹的家私，會當予學生免登入佇頂面鋪文佮互動，頭一改的高雄場我就有咧用，會當予逐家問問題，嘛會當出任務予逐家做，完成了後分享去 Padlet，臨時想欲貼啥物連結予學生嘛較方便，嘛通發起一寡投票做調查。效果是一直攏真好，嘛定定有學員共我問這个平台是啥，後來嘛用佇𪜶家己的教學內底。較可惜的是這个平台有限制免費口座會當開的檔案數量，較袂當一直共成果留佇遐，定期就愛共舊的刣掉。
改做兩工中央的即時評量
上新的這改共課程拆做兩工，頭一工尾仔我就隨予學員添表單調查𪜶的學習狀況佮意見，有學員反應想欲針對疊詞的搜揣有閣較濟的舉例，閣有一寡符號希望會當閣餾，第二工我就會當隨提供𪜶需要的內容，有影是足方便。看著有學員留話寫講「真感謝老師，有設想著共每一步 ê 動作攏寫做筆記」，嘛是真感慨，辦甲第六場改變上濟進步足濟的就是寫筆記的方式，無頭前的經驗我嘛袂使去設想每一步，閣有逐家會拄著的問題佮思考的重點。
感謝
年初台北場辦了我嘛捌寫過一篇 心得 ，這門課程會產生有影是三生有幸，若無許慧如老師佇課程的邀請，閣有林佳怡老師的推薦佮程俊源老師的信任，這門課才無通一直行到遮。感謝俊源先生的助理群一直提供真專業的行政支援，嘛感謝逐改課程來報名的所有的學員，希望這門課對恁有幫贊。