教典應用工作坊台北場雜記
昨昏台北場教典應用工作坊圓滿結束矣，後禮拜閣有台中場。身體是誠忝，毋過真暢。這个課程其實已經有三代版本矣，三个版本的講義我攏會貼佇後一段，講義文字內容攏以 CC-BY 4.0 授權開放，歡迎逐家參考利用。
2024 欲開始頭一个碩士班學期進前，我原底就按算想欲修許慧如先生的臺語通論。結果猶未開學，老師就共我講想欲揣一禮拜請我去𤆬教典應用的課程，我共老師講我有想欲修課，老師就講按呢就算我的期中報告。
就按呢 2024 十月我佇師大台文所𤆬研究所的同學耍兩點半鐘的教典，講義編編咧嘛有 397 逝四千外字，共 REGEX 的基礎、按怎用表格家私處理教典原始資料、閣有各種教典的細節、體例、附錄佮較少人咧看的內容攏分享予同學。
後來佳怡先生共我的講義佮內容介紹予中教大的俊源先生，伊的團隊嘛是目前上主要負責維護教典的團隊，俊源先生就講拄好會使邀請我去辦研習，in 對我嘛是誠信任，一改就開北中南三場，攏是規日六點鐘的課程。這嘛是我頭一改準備六點鐘的研習，驚講內容無夠，加準備真濟 REGEX 的練習題目佮原理，閣有做紙本的講義。講義嘛變做 573 逝，七千外字的內容。
十二月高雄場是頭一改，心情是誠緊張，多數學員攏是南部資深的本土語言先生，逐家攏會使做我的爸母矣，佮碩士班的同學性質是差真濟。頭一改內容的準備實在是傷貪心，就算時間有兩倍以上，人的大腦猶是干焦一粒爾。同學嘛誠頂真，中晝 Tiok-àn 先生共我分享伊寫的筆記，伊閣有發現一寡我的講義的錯誤，嘛予我下晡增加一个整理心智圖的活動的靈感。這改嘛有見著真濟網友，像 Lē-gio̍k 先生佮 Nóo-lah 先生，佮逐家互動真歡喜。
這改台北場第三代的課程就閣較順利矣，經過高雄場的經驗，我共內容閣再調整。簡化表格操作的內容，較濟咧介紹我已經整理好勢的資料佮資源。而且嘛整合一份經過處理較方便使用的教典原始資料變做「活用教典 101」，效果真好，這个檔案我嘛囥佇留話區，最近有閒才閣寫一篇文章介紹。
真感謝慧如先生、佳怡先生佮俊源先生的牽成，嘛感謝程先生的助理雅婷處理真濟代誌，教典僻智識寫甲予官方認證實在誠榮幸，後禮拜閣有台中場，繼續加油。